O noso espectáculo: O HOME ALMOFADA, de Martin McDonagh

Este é o cartaz do noso primeiro espectáculo: O HOME ALMOFADA, do dramaturgo angloirlandés Martin McDonagh. Estrearemos esta comedia moi, moi negra no FETEGA do Carballiño, o día 5 de Setembro deste ano...máis información, nos vindeiros días!

Próximamente...

En breve adiantaremos máis novas sobre o noso primeiro proxecto, que estrearemos a principios de Setembro na provincia de Ourense...

Quén son ilMaquinario?

ilMaquinario Teatro xorde da unión de cinco profesionais do teatro galego que, tras coñecerse no marco dos seus estudos na Escola Superior de Arte Dramática de Galicia,  decidiron unirse para elaborar un proxecto teatral común, baseado na investigación e posta en escena de dramaturxias contemporáneas. 

TITO ASOREY
Director de escena

Licenciado en Historia e Titulado Superior en Arte Dramática, especialidade de Dirección de Escena e Dramaturxia. Comeza a súa carreira profesional como intérprete en Sarabela Teatro, compañía na que traballa de xeito ininterrompido dende o ano 2000 ata o 2010. No ano 2011 pasa a formar parte do elenco da última montaxe de Ur Teatro, Macbeth, dirixida por Helena Pimenta. Esta experiencia como actor foi complementada coa dirección de múltiples colectivos teatrais, entre os que destaca o Grupo de Teatro Tarumba, co que acadou nos anos 2007, 2008 e 2010 o Premio Nacional de Teatro Joven Buero ao mellor espectáculo e á mellor dirección polas súas montaxes Remanente #1, Mort  e Don Juan, que foron representadas na sede do Centro Dramático Nacional. No ano 2010 da o paso á dirección profesional coa montaxe Ai Carmela!, da compañía Teatro de Adro. 

FRAN LAREU
Actor

Fran Lareu é Titulado Superior en Arte Dramática na especialidade de Interpretación Textual pola ESAD de Galicia. Despois de pasar pola escola Espazo Aberto de Santiago de Compostela, comeza a súa relación profesional coa farándula da man das compañías Viravolta e Seisdedos. Seguirase formando no mundo das artes con mestres como Joseph Collard (clown), Nuria Montero ou Ángel Almazán (voz), ademais de obter unha bolsa da Unión Europea para a realización dun curso de teatro e circo na República Checa. Continúa a súa carreira profesional coas compañías Teatro da Gavela, Zancalino Produs, Fantoches Baj, Boneca Lareta, Nasdrovia Producciones e Elefante Elegante, onde realiza obras como O Forno. Formouse ademais no conservatorio profesional de Lalín como trompetista e traballou en diferentes cargos de dirección e produción en series de televisión e cine.

MELANIA CRUZ

Actriz

Melania Cruz (Diplomada en Maxisterio por Lingua Estranxeira e Titulada Superior en Arte Dramática, especialidade de Interpretación Textual) interésase dende nova polo teatro afeccionado da súa cidade. Despois  fórmase na Aula Universitaria da USC no Campus de Lugo baixo a dirección de Paloma Lugilde e Quico Cadaval, asistindo tamén a diversos talleres impartidos por profesionais como Vicente Fuentes, Isabel Úbeda, Fernando Soto, Manuel Lourenzo, Nuria Inglada, Ermel Morales, Ánxeles Cuña, Jeremy James ou Eduardo Vasco. Finalmente, decide especializarse en Interpretación Textual na ESAD de Galicia. Como actriz profesional, está vinculada á produtora Escénate dende o 2009 con tres espectáculos e a Teatro de Adro con Ai, Carmela!, estreado en 2010. 

LAURA MÍGUEZ

Actriz

Titulada Superior en Arte Dramática, Diplomada en Educación Social, e con formación na Escola de Arte Superior de Deseño. Inicia a súa andaina no teatro afeccionado en 2001 sendo dirixida por Mónica Sueiro, Tegra Carpenter ou Thelma Putnam. A nivel profesional protagoniza un musical con Cachuzo Teatro (Game Over), ademáis de traballar con Boneca Lareta, Arteficción e Teatro de Noroeste (Piratas). Fórmase en Teatro Social, técnica Roy Hart, técnica Suzuki, Sistema Stanislavski, Zancos, Commedia dell´Arte e Clown con profesionais como Manuel Vieites, Nuria Inglada, Petra Hoffmann, Avelino González ou Fina Calleja. Co fundadora da Asociación cultural Marañao. 

FERNANDO GONZÁLEZ

Actor

Fernando González (Titulado Superior en Arte Dramática na especialidade de Intepretación Textual),  coñece o mundo do teatro na súa cidade natal, Ourense, da man de Mónica Sueiro. Fórmase como actor dentro do grupo Teatro do Grilo entre os anos 2003 e 2006. A partires do ano 2006 comeza a súa formación na Escola de Arte Dramática de Galicia (ESAD). Nela forma parte do proxecto O dondo sabor das mazás, no que se puxeron por vez primeira en pé os textos surrealistas de Álvaro Cunqueiro. Traballa coma profesional dende o ano 2007 na compañía Teatro do Noroeste, coa que participou nas montaxes Romeo e Xulieta, Glass city, Historias Peregrinas e Piratas, todos dirixidos por Eduardo Alonso. No ano 2012 pasa a formar parte do elenco do musical Galicia Caníbal, dirixido por Quico Cadaval. 

Qué é ilMaquinario?

iLMaquinario, Proxectos escénicos é unha compañía de nova creación conformada na súa totalidade por licenciados da Escola Superior de Arte Dramática de Galicia: Fran Lareu, Tito Asorey, Melania Cruz, Laura Míguez e Fernando González, baixo a cobertura empresarial de Xingreira Produccións.   Nun panorama socioeconómico como o que estamos a vivir, asumimos o risco de crear un proxecto no que nos entregamos con total paixón co fin de por en pé o teatro que soñamos, construído por artistas novos pero con  experiencia en diversas compañías (Ur Teatro, La Imagina Machina, Sarabela Teatro, Teatro de Adro, Teatro do Noroeste, Escénate ou Viravolta). Unha compañía con vocación de continuidade, que privilexie o traballo do actor como explorador da natureza humana, ofrecendo ao seu público historias que susciten debate e controversia, e ao mesmo tempo sexan pracenteiramente lúdicas. Un teatro de grande intensidade sustentado no traballo colectivo e que persegue un novo tipo de relación co espectador.